اس کے ساتھ ہی نماز عصر سے قبل مجلس ختم قرآن اور بعد نماز عصر قصیدہ بردہ شریف کی محفل بھی منعقد کی گئی۔
سید شاہ گیسودراز خسرو حسینی صاحب سجادہ نشین درگاہ حضرت بندہ نواز کی سرپرستی میں قرأت و نعت کی محفل عمل میں آئی۔
اس موقع پر حضرت خسرو حسینی صاحب سجادہ نشین درگاہ حضرت بندہ نواز نے جلسہ قرأت و نعت میں حصہ لینے والے تمام قراء و نعت خواں سے اظہار تشکر فرمایا۔
درگاہ مسجد میں اس جلسہ میں سامعین کی کثیر تعداد رہنے پر اظہار مسرت کرتے ہوئے انہوں نے کہا کہ سامعین کرام کی بڑی اہمیت ہوتی ہے۔ کسی بھی جلسے کی کامیابی کا انحصار سامعین پر ہی ہوتا ہے۔
انہوں نے یہ بھی کہا کہ قرآن مجیدصرف سر پر رکھنے اور چومنے کی چیز نہیں ہے بلکہ اس کتاب مقدس سے ہدایت حاصل کرنے کے لیے عربی زبان کا سیکھنا بھی ضروری ہے۔ عربی سیکھنے کے لیے قرآن مجید سے بہتر اور کوئی ذریعہ نہیں ہے۔
دارالعلوم دینیہ بندہ نواز گلبرگہ میں خواجہ بندہ نواز یونیورسٹی گلبرگہ کے تحت دو برس کا عربی ڈپلومہ کورس شروع کیا جا رہا ہے۔
اس کورس کی خصوصیات یہ ہے کہ اس میں عربی تعلیم بذریعہ قرآن ہوگی اور ایک برس مکمل ہونے پر سند دی جائے گی لہذا اس سے استفادہ کریں۔
اس جلسہ نعت وقرأت میں سید اسحاق، سید صادق، محمد لیاقت علی، امجد سرمست، سید نور محمد گلبرگہ، حیدرآباد کے قاری رضوان قریشی خطیب مکہ مسجد اور دیگر علماء کرام نے شرکت کی۔
