ریاست کرناٹک کے دارالحکومت بنگلورو میں کورونا وائرس کے بڑھتے کیسز کے پیش نظر کرناٹک کی یدی یورپا حکومت نے بنگلورو میں ایک ہفتہ کے مکمل لاک ڈاؤن کا اعلان کیا ہے حالانکہ حکومت نے قبل ازیں دوبارہ لاک ڈاؤن کے نفاذ سے انکار کرتے ہوئے کہا تھا کہ اس سے ریاست کی اقتصادی حالت مزید خراب ہوگی لیکن آئے دن کورونا کی بڑھتی اس وباء کی روک تھام کے سلسلے میں یہ قدم اٹھایا گیا ہے۔
یہ لاک ڈاؤن بنگلورو کے شہری اور دیہی علاقوں میں 14 جولائی کی صبح 8 بجے سے 22 جولائی کی صبح 5 بجے تک نافذ رہے گا.اس لاک ڈاؤن کے دوران ضروری اشیاء کی خدمات جاری رہیں گی۔
وزارت صحت کے تازہ اعداد وشمار کے مطابق پچھلے 24 گھنٹوں میں شہر بنگلورو میں 23 کورونا پازیٹیو پائے گئے ہیں۔ اب تک کُل 229 کووڈ-19 مریض ہلاک ہوئے ہیں اور شہر میں کُل 12،793 کیسز فعال ہیں۔
کورونا وائرس کی اس مہلک وباء سے اب تک کرناٹک میں کل 33،418 کیسز درج ہوئے ہیں جن میں 13،836 افراد علاج کے بعد صحتیاب ہوئے ہیں اور 543 افراد کی موت ہوئی ہے۔
