حادثہ بیلگام ضلع کے اتھانی تعلقہ میں پیش آیا جہاں ندی پر کپڑا دھونے کی غرض سے ندی پر گئے چار افراد ندی میں ڈوب گئے۔ کولہاپور ڈیزاسٹر مینجمینٹ اور این ڈی آر ایف کی جانب سے ان کی تلاشی جاری ہے۔
تفصیلات کے مطابق چاروں اشخاص آپس میں رشتہ دار ہیں۔ جن کی شناخت 36 سالہ پرشورام گوپال بنسوڈے، 24 سالہ سداشیو گوپال بنسوڈے، 20 سالہ شنکرا گوپال بنسوڈے اور 22 سالہ دریاپا گوپال بنسوڈے کے طور پر ہوئی ہے۔
بتایا جا رہا ہے کہ یہ چاروں بھائی ندی پر کپڑا دھونے گئے تھے اسی دوران ایک بھائی پانی میں ڈوبنے لگا تو اسے بچانے کی کوشش میں بقیہ بھی ڈوب گئے جنہیں تلاش کرنے کی کوششیں جاری ہیں۔
کولہا پور ڈیزاسٹر مینجمنٹ آفیسر پرساد سنکپال کی رہنمائی میں ڈسٹرکٹ ڈیزاسٹر مینجمنٹ اسکواڈ نے جدید آلات کے ساتھ سرچ آپریشن شروع کیا ہے جس میں اسکوبا ڈائیونگ سسٹم کا بھی سہارا لیا جا رہا ہے۔
