بنگلورو: سابق مرکزی وزیر ڈاکٹر کے رحمان خان نے کہا کہ بھارتیہ جنتا پارٹی کا اس وقت سی اے اے کے نفاذ کی باتیں کرنا آنے والے پارلیمانی انتخابات کے لئے ایک اسٹنٹ ہے اور اس کے نفاذ پر بھارت کا دستور روک لگائے گا۔ اس سلسلے میں بات کرتے ہوئے سوشیل ڈیموکریٹک پارٹی کرناٹک کے صدر عبد المجید نے کہا کہ غیر دستوری و عوام مخالف قانون سی اے اے کے خلاف عوام اٹھ کھڑی ہوگی اور اس کے نفاذ کو ناکام کریگی۔
عالم و دین و سماجی کارکن مفتی عذیر احمد قاسمی نے کہا کہ این آر سی و سی اے اے مسلمانوں میں خوف پھیلانے کی سیاست ہے، جس کے ذریعے فسطائی طاقتیں اپنے سیاسی مفاد کے لئے ووٹوں کی خاطر ایس. سی/ایس. ٹی اور او. بی. سی کو ذہنی طور پر "ہندو" بنانے کی سازش رچ رہی ہے جو ناکام ہوکر رہے گی۔ ان رہنماوں نے کہا کہ بی جے پی حکومت ایک بار پھر 2024 کے پارلیمانی انتخابات پر نظر ڈال کر شہریت کا مسئلہ اٹھا رہی ہے۔
واضح رہے کہ ملک بھر میں کئی اپوزیشن پارٹیوں نے سی اے اے اور این آر سی قانون کی مخالفت کی ہے لیکن بی جے پی کہتی رہی کہ اپوزیشن ووٹ بینک کی سیاست کی وجہ سے مخالفت کر رہی ہے۔نریندر مودی کی قیادت والی مرکزی حکومت کی جانب سے سی اے اے قانون دسمبر 2019 میں منظور کیا گیا تھا لیکن ابھی تک اس پر عمل درآمد نہیں ہوا، کیونکہ پچھلے 4 سالوں میں اس قانون کے رولز ہی فریم نہیں کئے گئے۔ لیکن اب وزارت داخلہ نے کہا ہے کہ شہریت ترمیمی قانون (سی اے اے) کے رولز مارچ 2024 تک تیار کئے جائیں گے۔
وزارت داخلہ رولز کو فریم کرنے کے لئے متعلقہ پارلیمنٹ کمیٹی سے اب تک 9 مرتبہ ایکسٹینشن لے چکی ہے۔ سی اے اے کی چوتھی سالگرہ کے موقع پر نارتھ ایسٹ ریاستوں کے دارالحکومتوں میں آٹھ طلبہ تنظیموں کی جانب سے 'یوم سیاہ' کے طور پر منایا گیا جہاں کالے جھنڈے اور بینرز دکھائے گئے اور دارالحکومت دہلی میں سی اے اے یوم بیداری منایا کر شاہین باغ کو سمبل آف رسسٹنس کے طور پر (مزاحمت کی علامت) یاد کیا گیا۔
مزید پڑھیں: 'شاہین باغ کی خاتون مظاہرین جمہوریت کو مزید مضبوط کررہی ہیں'
یاد رہے کہ 2021 میں ایک انتخابی مہم میں امت شاہ نے اعلان کیا تھا کہ سی اے اے کو کورونا وائرس وبا کے بعد نافذ کیا جائے گا لیکن بھارتیہ جنتا پارٹی نے اس معاملے پر کوئی بات نہیں کی کیونکہ اس وقت اسے مغربی بنگال پنچایت انتخابات میں ناکامی سے بڑا دھچکا لگا تھا، لیک اب حال ہی میں کولکتہ میں ایک عوامی میٹنگ کے دوران وزیر داخلہ امت شاہ نے کہاکہ 'سی اے اے ملک کا قانون ہے، اس کے نفاذ کو کوئی نہیں روک سکتا۔