ریاست کرناٹک کے بنگلور میں آئی ایم اے حلال سرمایہ کاری کے دھوکہ دہی معاملے میں متاثرین کو حکومت کی جانب سے ریفنڈ کلیم فارمز دئے جارہے ہیں، جو کہ آن لائن بھر کر کامپیٹینٹ اتھارٹی کو سبمٹ کر سکتے ہیں۔
اس سلسلے میں حکومت کی جانب سے ریاست بھر کے 'بنگلور ون سینٹرز' اور دیگر اضلاع میں بھی ریفنڈ کلیم فارمز بھرے جا رہے ہیں۔ حکومت کی جانب سے فارمز کو سبمٹ کرنے کے لئے ایک ماہ کا وقت دیا گیا ہے، 25 نومبر سے 24 دسمبر تک یہ فارمز بھرے جاسکتے ہیں۔
وہیں اس سلسلے میں آج ای ٹی وی بھارت نے شہر کے بینسن ٹاؤن میں واقع 'بنگلورو ون' میں فارم بھرنے پہونچے آی ایم اے کے متاثرین سے بات کی۔ متاثرین کو کلیم فارمز بھرنے میں دشواریوں کا سامنا کرنا پڑرہا ہے۔
انہوں نے بتایا کہ 'اس ذمہ داری کو نبھانے کے لئے اہلکار کم ہیں، جبکہ متاثرین کی تعداد زیادہ ہے۔ ساتھ ہی 'سرور ڈاؤن' کا مسئلہ بھی پیش آرہا ہے۔ جس کی وجہ سے کئی متاثرین کو ایک سے زیادہ مرتبہ چکر لگانا پڑرہا ہے۔'
اس موقع پر متاثرین نے حکومت کے متعلقہ محکمہ سے گزارش کی ہے کہ اہلکاروں کی تعداد بڑھائی جائے اور 'سرور ڈاؤن' کے مسئلے کو جلد از جلد دور کیا جائے۔'
