’پیارا دستور‘ عنوان کے تحت منعقد کئے گئے تحریری مقابلہ میں طالبات نے شاندار مظاہرہ پیش کیا۔ اس ضمن میں بہمنی فاونڈیشن گلبرگہ کی جانب سے میٹرو فنکشن ہال میں تقریب تقسیم انعامات منعقد کی گئی جس میں ہائی اسکول کے طلبا و طالبات کی بڑی تعداد نے شرکت کی۔
تقریب میں خطاب کرتے ہوئے محمد عظیم الدین ایڈوکیٹ نے کہا کہ ملک کے دستور کو کوئی بدل نہیں سکتا جبکہ ہمارا ملک جمہوری ہے۔ یہاں ہر مذہب کے ماننے والوں کو برابر کے حقوق دیئے گئے ہیں۔ انہوں نے مرکزی حکومت پر تنقید کرتے ہوئے کہا کہ جمہوری نظام کو تبدیل کر نے کی کوشش کی جارہی ہے۔
انہوں نے کہا کہ حکومت کی غلط پالیسیوں کی وجہ سے لوگ پریشان ہیں۔ مسلمانوں کو این آر سی، گئوکشی، لوجہاد جیسے عنوان سے نشانہ بنانے کی کوشش کی جارہی ہے تاہم موجودہ حالات کے پیش نظر مسلم طلبا میں دستور سے متعلق آگاہی کی ضرورت ہے۔
’پیارا دستور‘ عنوان پر منعقدہ تحریری مقابلہ میں شاندار مظاہرہ کرنے پر متعدد طلبا کو انعامات سے نوازا گیا۔
