ریاست کرناٹک کے ضلع یادگیر میں کرناٹک ٹیپوسلطان یوتھ کمیٹی کی جانب سے ڈپٹی کمشنر کے دفتر کے سامنے ایک احتجاج کیا گیا۔
واضح رہے کہ یہ احتجاج یادگیر کے ابے تمکور دیہات کی جامع مسجد کی وقف کی زمین کے پیش نظر کیا گیا جو زمین جامع مسجد کے متولی نے فروخت کردی ہے۔
اس کو دوبارہ وقف میں اندراج کروانے کی اپیل کرتے ہوئے احتجاج کیا، اس موقع پر ارشد دکنی صدر کرناٹک ٹیپوسلطان یوتھ کمیٹی نے میڈیا سے خطاب کرتے ہوئے کہا کہ جامع مسجد کی جگہ واپس کی جائے۔
انہوں نے کہا کہ 'اگر زمین کو وقف کے حوالے نہیں کیا گیا تو میں جامع مسجد کی زمین پر جا کر بھوک ہڑتال کروں گا'۔
انہوں نے مطالبہ کیا کہ ضلع میں وقف کی زمینوں پر ناجائز قبضوں کو ہٹا کر حکومت وقف بورڈ کی جگہ کی تحفظ کرے۔
انہوں نے کہا کہ اسی سلسلے میں یہ احتجاج کیا جا رہا ہے اور ضلع انتظامیہ کو ایک یاد داشت بھی پیش کی گئی ہے، جس میں وقف کی فروخت کی گئی زمین کو دوبارہ وقف کے حوالے کرنے کی اپیل کی گئی ہے۔
