ریاست کرناٹک کے ضلع یادگیر کے گرمٹکل تعلقہ میں گاندھی میدان سے تحصیل آفس تک جے بھیم تنظیم گرمٹکل کے زیر اہتمام جنسی زیادتی کی شکار متاثرہ کے انصاف کے لیے پرامن کینڈل مارچ نکالا گیا۔ اس موقع پر بلا تفریق مذہب و ملت نوجوانوں نے اس پرامن کینڈل مارچ میں حصہ لیا۔
اس موقع پر مولانا نواز خان نظامی نے احتجاجی مظاہرے سے خطاب کرتے ہوئے کہا کہ ملک کے دارالحکومت دہلی میں ایک معصوم لڑکی کے ساتھ اس طرح کی حرکت ہوتی ہے اور پھر اس کو قتل کیا جاتا ہے۔
انہوں نے مرکزی حکومت سے اپیل کرتے ہوئے کہا کہ اس طرح کی حرکت کرنے والوں کو فوری گرفتار کرتے ہوئے پھانسی کی سزا دی جائے۔
انہوں نے کہا کہ متاثرہ کے خاندان والوں کو سرکاری نوکری دی جائے اور ان کی جان کی حفاظت کی جائے۔
سماجی کارکن باشاہ نے اس موقع پر کہا کہ ایک پولیس کی ڈیوٹی انجام دینے والی لڑکی کے ساتھ اس طرح کا ظلم ہوتا ہے تو عام لڑکیوں کے ساتھ کیا سلوک ہوتا ہوگا یہ غور کرنے کی بات ہے۔ انہوں نے کہا کہ متاثرہ کے قاتلوں کو سخت سے سخت سزادی جائے۔
یہ بھی پڑھیں: بنگلور: ملک میں بڑھتی مہنگائی کا آخر کیا حل ہے؟
اس موقع پر جے بھیم کے صدر گرو، سید خواجہ معین الدین، فیاض احمد، انور احمد اراکین بلدیہ گرمٹکل، سید اکبر سابقہ رکن بلدیہ گرمٹکل، لنگپا، عبدالوحید، مقبول احمد، ناگیش، عادل ربانی، لال احمد کے علاوہ کثیر تعداد میں نوجوان شریک تھے۔
