حکومت تیسری لہر کے حوالے سے اپنی حکمت عملی جلد تیار کرے: ڈاکٹر ناصر حسین

بنگلور کے راجیہ سبھا رکن پارلیمان ڈاکٹر ناصر حسین اور ڈاکٹر سعد بلگامی نے مرکزی اور ریاستی حکومت سے اپیل کی ہے کہ حکومت کورونا کی تیسری لہر کے حوالے سے ماہرین کے ساتھ بات چیت کرے اور اس سے نمٹنے کے لیے ضروری اقدامات اٹھائے۔

ریاست کرناٹک کے بنگلور شہر کے راجیہ سبھا کے رکن پارلیمان ڈاکٹر ناصر حسین نے کورونا کی دوسری لہر کے پھیلاؤ کے متعلق کہا کہ ویکسینیشن اس وبا کی روک تھام میں کارگر ثابت ہوسکتا ہے، لیکن حکومت نے اس حوالے سے کوئی مثبت انتظام نہیں تیار کیا ہے۔اس لیے حکومت کو چاہیے کہ وہ اس مسئلے کو سنجیدگی سے لے اور جلد از جلد حکمت عملی تیار کرے۔

وہیں اس سلسلے میں جماعت اسلامی کرناٹک کے صدر ڈاکٹر سعد بلگامی نے کہا کہ وبا کی پہلی لہر کے بعد جو وقفہ ملا تھا اس میں حکومت کی جانب سے لاپرواہی برتی گئی۔حکومت میڈیکل انفراسٹرکچر و فیسیلیٹیز کو تیار کرنےکے بجائے اپنی سیاسی مفادات کو پر کرنے اور انتخابات میں مصروف رہی ۔جس کی وجہ سے نہ صرف وبا تیزی سے پھیلی بلکہ ملک کو بے روزگاری ، مہاجر مزدور و اسی طرح کے کئی مسائل کا سامنا کرنا پڑا۔

اس سلسلے میں ڈاکٹر ناصر حسین و ڈاکٹر سعد بلگامی نے مرکزی و ریاستی حکومتوں سے اپیل کی کہ حکومت ماہرین کے مشوروں و بہتر کوآرڈینیشن کے ساتھ تیسری لہر کی تیاریاں کرے اور مریضوں کی زندگیاں بچائے۔ واضح رہے کہ کورونا وائرس کے کیسز میں کچھ کمی ضرور آئی ہے، لیکن وبا کے پھیلاؤ میں کمی نہیں آرہی ہے۔ اس مہلک وبا کی تیسری لہر بھی سر پر ہے۔ اب تک اس وبا کے زد میں لاکھوں لوگوں کی جانیں جاچکی ہیں۔اب دیکھنا یہ ہوگا کہ مرکزی و ریاستی حکومتیں آنے والی تیسری لہر سے عوام کو بچانے کے لیے کس طرح کے احتیاطی تدابیر پر عمل پیرا ہوتی ہے۔