بیدر: کرناٹک اسمبلی انتخابات 2023 کے لیے کانگریس نے امیدواروں کی پہلی فہرست جاری کی ہے۔ ریاستی اسمبلی انتخابات کے لیے اس سال ہونے والے کرناٹک اسمبلی انتخابات کے لیے 124 امیدواروں کی پہلی فہرست کا اعلان کیا گیا ہے۔اس فہرست میں بیدر شمال سے مسلسل چوتھی مرتبہ رحیم خان کو ٹکٹ دیا گیا ہے۔ بیدر شمال حلقے سے 6 کانگریس قائدین نے ٹکٹ کے لیے درخواست دی تھی لیکن کانگریس پارٹی کے اعلیٰ ذمہ داران نے چوتھی مرتبہ بھی بیدر شمال کے لیے موجودہ رکن اسمبلی رحیم خان کو ٹکٹ دیا ہے۔ بیدر کی تاریخ میں ایسا پہلی بار ہوا ہے کہ کانگریس پارٹی میں مسلسل چوتھی بار کسی کو اپنا امیدوار بنایا گیا ہے۔ رحیم خان کی مسلسل تین بار کامیابی سے یہ اندازہ لگایا جا رہا ہے کہ چوتھی بار بھی وہ اس بیدر شمال اسمبلی حلقے سے کامیاب ہوں گے۔
یہ بھی پڑھیں:
- Karnataka Assembly Elections کرناٹک اسمبلی انتخابات کے لیے کانگریس امیدواروں کی پہلی فہرست جاری
- MLA Bandeppa Kashempur رکن اسمبلی بنڈپا قاسم پور نے کسانوں کے لئے معاوضے کا مطالبہ
بیدر ضلع کے جنوب سے اس بار بھی اشوک کھنی کو ٹکٹ دیا گیا ہے جب کہ بیدر جنوب سے چندرا سنگھ کا نام بھی سرخیوں میں رہا تھا لیکن کانگریس پارٹی نے اس بار بھی بیدر جنوب اسمبلی حلقہ سے اشوک کھنی کو اپنا امیدوار بنایا ہے اس کے علاوہ کرناٹکا پردیش کانگریس کمیٹی کے کارگزار صدر و رکن اسمبلی بھالکی ایشور کھنڈرے کو دوبارہ سے بھالکی اسمبلی حلقہ سے ٹکٹ دیا گیا ہے۔ بیدر ضلع کے تعلقہ ہمنا آباد سے راج شیکھر پاٹل کو ٹکٹ دیا گیا ہے جو فی الحال ہمنا آباد کے رکن اسمبلی ہیں۔ اس طرح سے بیدر ضلع کے چار اسمبلی حلقہ جات کے لیے ٹکٹ کے ناموں کا اعلان ہوا ہے ان میں تین نام موجودہ اراکین اسمبلی کے ہیں۔
ضلع کے باقی دو اسمبلی حلقہ جات اوراد اور بسواکلیان کے لیے امیدواروں کا نام اعلان ہونا باقی ہے جو ممکن ہے دوسری فہرست میں ان دو اسمبلی حلقہ جات کے کانگریس امیدواروں کے نام شامل ہوں گے۔ واضح رہے کہ ریاست کرناٹک میں اسمبلی انتخابات کو لے کر اب تک تین سیاسی پارٹیوں نے اپنے امیدواروں کا نام کا اعلان کیا ہے۔ جن میں جنتادل سیکولر پارٹی نے 92، عام آدمی پارٹی 80 اور کانگریس نے 124 امیدواروں کے ناموں کا اعلان کیا ہے۔ ممکن ہے باقی پارٹیوں کی جانب سے بھی اپنے اپنے امیدواروں کے ناموں کا جلد ہی اعلان ہوگا لیکن سب کی نگاہیں بی جے پی پارٹی کی پہلی فہرست پر لگی ہے۔
