ریاست کرناٹک کے ضلع بیدر دورہ کے موقع پر آل انڈیا لائرز یونین کے اسسٹنٹ جنرل سیکریٹری سرینواس کمار نے میڈیا سے بات کرتے ہوئے کہا کہ جہاں کہیں بھی شہریوں پر قانون کا غلط استعمال ہوتا ہے ہم اس سلسلے میں فوری طور پر تحقیق و تفصیلات حاصل کرکے غلط قانون سے متاثر افراد کی قانونی چارہ جوئی کرتے ہیں۔
اسی سلسلے میں ہم شاہین اسکول پر لگائے گئے دفعات اور پولیس کی جانب سے معصوم طلبا سے پوچھ تاچھ کے سلسلے میں بیدر آئے ہیں۔
انہوں نے کہا کہ پہلے ہم نے شاہین اسکول اور پھر جیل پہنچ کر صدر معلمہ اور طلبا کے والدین سے ملاقات کی اور ساتھ ہی محکمہ پولیس کی اعلی ذمہ داران سے بھی اس کیس سے متعلق تفصیلات حاصل کی۔
انہوں نے کہا کہ شکایت کنندہ کی شکایت پر پولیس کی جانب سے فوری ملک سے غداری کا کیس درج کرنا یہ قانون کا غلط استعمال ہے، جس کی ہم سخت مذمت کرتے ہیں۔ اس سلسلے میں جہاں تک ہو سکے گا ہم قانونی چارہ جوئی بھی کریں گے۔
انہوں نے کہا کہ محکمہ پولیس نے ہم سے کہا ہے کہ ابھی تحقیقات جاری ہیں۔
بتا دیں کہ اس پریس کانفرنس میں سیکولر سٹیزن فورم کے قانونی ونگ کے ذمہ داران بھی موجود تھے۔
