جھارکھنڈ حکومت نے آج سنٹرل بیورو آف انوسٹی گیشن کو دی جانے والی رضامندی کو واپس لینے کا اعلان کیا۔ نیشنل انوسٹی گیشن ایجنسی کے برخلاف سی بی آئی کو ڈی پی ایس ای ایکٹ کے تحت ریاستی حکومت کی رضامندی کی ضرورت ہوتی ہے جبکہ این آئی اے کو ملک میں کہیں بھی کاروائی کا اختیار حاصل ہے۔
ہیمنت سورین حکومت نے ریاست میں تحقیقات کےلیے سی بی آئی کو دی اجازت کو واپس لے لیا ہے۔ اب جھارکھنڈ میں تحقیقات سے پہلے سی بی آئی کو ریاستی حکومت سے اجازت لینی ہوگی۔
آج اس سلسلہ میں ایک جی او جاری کیا گیا جس کے تحت ریاست میں تحقیقات کےلیے سی بی آئی کو حاصل پرمیشن کو برخواست کردیا گیا اور اب بیورو کو کسی بھی کاروائی سے پہلے اجازت کا حصول ضروری ہوگا۔
ریاست بہار میں 19 فروری 1996 کو ایک حکم نامہ جاری کرکے سی بی آئی کو بغیر کسی اجازت ریاست میں تحقیقات کےلیے رضامندی ظاہر کی گئی تھی جبکہ 2000 میں بہار سے علحدہ کرکے جھارکھنڈ کو ریاست کا درجہ دیا گیا تھا۔
