اس خبر کو سب سے پہلے ای ٹی وی بھارت نے نشر کیا تھا، خبر نشر کیے جانے کے 12 گھنٹوں کے اندر ریاستی وزیر سی پی سنگھ نے اسکول میں جمع پانی باہر نکلوایا۔
ریاستی محکمۂ ترقیات کے زیر انتظام چلنے والے اس گرلز ہائی اسکول میں زیر تعلیم تقریباً 360 طالبات کو کافی دقتوں کا سامنا کرنا پڑرہا تھا۔
خبر نشر ہونے کے بعد متعلقہ افسران کے علاوہ ریاستی وزیر سی پی سنگھ خود معائنہ کرنے لیے اسکول پہنچے اور انھوں نے متعلقہ افسران کی جم کر سرزنش کی اور فوری طور پر اسکول سے پانی باہر نکالنے کی ہدایات دی۔
افسران نے فوری طور پر بڑے بڑے پمپ لگاکر گٹھنے تک جمع پانی کو اسکول سے باہر نکلوایا جس کے بعد طالبات نے راحت کی سانس لی اور انھوں نے ای ٹی وی بھارت کا شکریہ ادا کیا۔
واضح رہے کہ رانچی کے مرکز میں واقع اس اسکول میں گزشتہ ایک ہفتے سے پانی بھرا ہوا تھا اور اسکول تالاب نما نظر آنے لگا تھا۔ اسکول کے کمرے، لائبریری، کچن سب ہی جگہ پانی سے بھر گئی تھی۔
اور اس کے سبب طالبات ایک کمرے سے دوسرے کمرے تک جانے کے لیے پٹروں کا سہارا لینے پر مجبور تھیں، اور لمبے وقت تک پانی جمع ہونے کی وجہ سے یہاں کیڑے مکوڑوں اور سانپوں کی آنے لگے تھے اور اسی سبب طالبات کو متعدد مسائل درپیش تھے۔
