جموں: جموں و کشمیر کے سرمائی دارالحکومت جموں میں کشمیری پنڈت ملازمین نے اپنے مطالبات کو لے کر ریلیف کمشنر آفس کے احاطے میں احتجاج کیا۔ مظاہرین مطالبہ کر رہے ہیں کہ اُنہیں کشمیر سے ٹرانسفر کیا جائے۔ یو این آئی اردو کے نامہ نگار نے بتایا کہ پیر کے روز ریلیف کمشنر آفس جموں میں کشمیری پنڈت ملازمین نے احتجاجی مظاہرے کئے۔ مظاہرین نے حکومت سے مطالبہ کیا کہ اُنہیں جلد از جلد جموں میں ٹرانسفر کیا جائے کیونکہ کشمیر میں حالات ابھی بھی پوری طرح سے معمول پر نہیں آئے ہیں۔ Kashmiri Pandits Employees appeal to JK Govt
نامہ نگاروں سے بات چیت کے دوران احتجاجی ملازمین نے کہا کہ 'کشمیر میں ٹارگیٹ کلنگ کا سلسلہ جاری ہے ایسے حالات میں کشمیر جانا خطرے سے خالی نہیں ہے۔ انہوں نے بتایا کہ حالات پوری طرح سے معمول پر آنے کے بعد وہ کشمیر جانے کے لئے تیار ہیں ۔ اُن کے مطابق سرکار کو چاہئے کہ وہ کشمیری پنڈت ملازمین کو جموں میں ہی تعینات کرے ۔
یہ بھی پڑھیں: Candle Light Protest in Budgam کشمیری پنڈت کی ہلاکت کے خلاف بڈگام میں کینڈل مارچ
انہوں نے مزید بتایا کہ کشمیری پنڈت ملازمین نے ہمیشہ اپنے فرائض خوش اسلوبی کے ساتھ انجام دئے تاہم ٹارگیٹ کلنگ کے پے در پے واقعات رونما ہونے کے بعد اب وہ کشمیر جانا نہیں چاہتے ہیں۔ انہوں نے ایل جی انتظامیہ سے مطالبہ کیا کہ کشمیری پنڈت ملازمین کے حق میں فوری طور پر ٹرانسفر پالیسی کو لاگو کیا جائے۔
یو این آئی
