انجمن امامیہ کی جانب سے حضرت علیؓ کے یوم ولادت پر پروگرام

جموں کشمیر کی سرمائی دارالحکومت جموں کے کربلا کمپلکس میں آج انجمن امامیہ جموں کی جانب سے حضرت علی رضی اللہ تعالی عنہ کے یوم ولادت پر ایک پروگرام کا اہتمام کیا گیا۔

اس موقع پر بطور مہمان خصوصی و مقرر مولانا شمشاد احمد نے اپنے خطاب میں کہا کہ' حضرت علی رضی اللہ تعالی عنہ نے اپنی زندگی میں ہمیشہ سچ گوئی کو فروغ دیا اور عوام کو سچائی کے جانب راغب کیا، اس لئے ہم لوگوں کو چاہیے کہ ہم اپنی زندگی میں ہمیشہ سچ بولیں، کیونکہ اللہ ہمیشہ سچ بولنے والوں کے ساتھ ہوتا ہے۔

اس موقع پر مولانا شمشاد احمد نے ای ٹی وی بھارت سے خصوصی گفتگو میں کہا کہ حضرت علی کا فرمان ہے کہ حق کے راستے پر چلنے والے ہمیشہ کامیابی سے ہمکنار ہوتے ہیں۔ جو لوگ سجدوں میں روتے ہیں، اُنہیں تقدیر پر نہیں رونا پڑتا۔ صبر ایک ایسی سواری ہے، جو سوار کو کبھی زیر نہیں ہونے دیتی۔ صبر کا دامن تھامنے والوں سے اللہ راضی ہوتا ہے۔

اپنے خطاب میں مولانا نے مزید نصیحت آموز باتیں بتائیں کہ' حضرت علی کرم اللہ وجہہ نے اسلام کی خاطر اپنے کنبہ کو قربان کردیا، لیکن صبر کا دامن نہیں چھوڑا۔ آج تقریباً چودہ صدی کے طویل عرصہ کے بعد بھی نہ صرف عالمِ اسلام، بلکہ غیر اسلامی افراد بھی اہل بیت کی قربانی کو ہر برس یاد کرتے ہیں اور یہ سلسلہ تاقیامت جاری و ساری رہےگا۔