ضلع جموں میں 50 فیصد افراد کو کورونا وائرس مخالف ویکسین فراہم کی جا چکی ہے جبکہ طبی مراکز و اسپتالوں میں بغیر تعطل کے ویکسینیشن کا عمل جاری ہے۔
گاندھی نگر ہسپتال کی میڈیکل سپرانٹنڈنٹ ڈاکٹر اندرا بٹیال نے ای ٹی وی بھارت کے ساتھ بات کرتے ہوئے دعویٰ کیا کہ ’’لوگوں کو ویکسین کے محفوظ ہونے کی مسلسل گزارشات کے بعد اب عوام از خود ٹیکہ کاری کے لیے سامنے آ رہے ہیں۔‘‘
انہوں نے مزید کہا کہ کورونا مخالف ویکسین اتوار اور چھٹیوں کے روز بھی فراہم کی جا رہی ہے، جبکہ اس کام پر مامور عملہ ایس او پیز کا لحاظ رکھتے ہوئے لوگوں کو ویکسین فراہم کر رہے ہیں۔
قابل ذکر ہے کہ گزشتہ چوبیس گھنٹوں کے دوران جموں و کشمیر میں عالمی وبا کورونا وائرس سے 1516افراد متاثر جبکہ 6افراد فوت ہو گئے۔ وہیں اس دوران 813 افراد صحت یاب بھی ہوئے ہیں۔ جموں و کشمیر میں کورونا متاثرین کی مجموعی تعداد ایک لاکھ اڑتالیس ہزار دو سو آٹھ پہنچ چکی ہے۔
یو ٹی جموں و کشمیر میں اب تک اس موذی وائرس کی وجہ سے دو ہزار ترسٹھ اموات ہو چکی ہیں، جبکہ ایک لاکھ تینتیس ہزار نو سو اکاسی افراد اس وائرس سے صحت یاب ہوئے ہیں۔
