جموں: جموں وکشمیر بھارتیہ جنتا پارٹی کی کور گروپ میٹنگ جموں میں منعقد ہوئی جس میں لوک سبھا انتخابات کی حکمت عملی پر تبادلہ خیال کیا گیا۔میٹنگ کے دوران پارٹی لیڈروں کو ہدایت دی گئی کہ وہ آنے والے پارلیمانی انتخابات کے لئے زور و شور سے تیاریاں شروع کریں۔
اطلاعات کے مطابق جموں میں بی جے پی کی ایک اعلیٰ سطحی میٹنگ منعقد ہوئی، جس میں مرکزی وزیر ڈاکٹر جتندر سنگھ ، بی جے پی قومی جنرل سیکریٹری ترون چگھ کے علاوہ سینیئر لیڈران نے شرکت کی۔
ذرائع نے بتایا کہ میٹنگ کے دوران بی جے پی کے لیڈروں کو ہدایت دی گئی کہ وہ پارلیمانی چناو کی خاطر گھر گھر مہم شروع کریں۔میٹنگ کے دوران لوک سبھا کی پانچ نشستوں پر جیت کی خاطر حکمت عملی طے کی گئی۔
معلوم ہوا ہے کہ لیڈران کو ہدایت دی گئی کہ وہ شہری علاقوں کے ساتھ ساتھ دیہی علاقوں میں بھی لوگوں کے ساتھ قریبی تال میل بنائے رکھیں تاکہ آنے والے پارلیمانی انتخابات میں پارٹی کے امیدواروں کی جیت کو یقینی بنایا جاسکے۔
میٹنگ کے بعد نامہ نگاروں سے بات چیت کے دوران وزیر اعظم دفتر میں تعینات وزیر مملکت ڈاکٹر جتیندر سنگھ نے کہا کہ ’پارٹی آنے والے انتخابات میں ترقی کے ایجنڈے پر لڑے گی۔‘
انہوں نے کہا کہ مودی جی کی قیادت میں مرکزی حکومت نے سماج کے ہر طبقے کے لئے کام کیا جو سب کے سامنے عیاں ہے۔ان کے مطابق پارٹی نے ووٹ کی سیاست سے اوپر اٹھ کر ہر طبقے کو انصاف فراہم کرنے کی خاطر کام کیا۔
مزید پڑھیں:
مرکزی وزیر نے مزید بتایا کہ آنے والے پارلیمانی انتخابات میں پارٹی جموں وکشمیر کی پانچ نشستوں پر کامیابی حاصل کرئے گی۔انہوں نے مزید بتایا کہ پارٹی نے جموں وکشمیر کے لوگوں کے ساتھ جتنے بھی وعدئے کئے انہیں پورا کیا لہذا ہمیں پورا یقین ہے کہ پارٹی سبھی نشستوں پر کامیابیوں کے جھنڈے گارڈ دے گی۔
(یو این آئی)
