گپکار اعلامیہ کے ارکین سے ملاقات پر بھیم سنگھ تمام عہدوں سے برطرف

عوامی اتحاد برائے گپکار اعلامیہ کے اراکین سے ملاقات کے فوراً بعد ہی جموں و کشمیر نیشنل پینتھرس پارٹی کے سینیئر رہنما بھیم سنگھ کو پارٹی کے تمام عہدوں سے ہٹا دیا گیا۔

اس فیصلے کا اعلان پینتھرس پارٹی کے چیئرمین ہرش دیو سنگھ نے ایک پریس کانفرنس کے دوران کیا۔

پینتھرس پارٹی کے چیئرمین ہرش دیو سنگھ نے بتایا کہ 'پارٹی نے بھیم سنگھ کو پینتھرس پارٹی کے سرپرست کے عہدے سے ہٹانے کا فیصلہ کیا ہے۔ وہ انفرادی طور پر اور پارٹی کو اطلاع دیے بغیر پی اے جی ڈی کے رہنماؤں سے ملنے گئے تھے۔ لہذا ، بھیم سنگھ کو مستقبل میں پارٹی کی فیصلہ سازی میں کوئی اختیار نہیں ہوگا۔ انہیں پارٹی کے تمام عہدوں سے ہٹا دیا گیا ہے۔'

ہرش دیو سنگھ نے بتایا کہ 'پینتھر پارٹی جموں خطے کے لوگوں کے حقوق کے لیے لڑے گی۔ پارٹی کے سینیئر لیڈران مل کر آئندہ کا لائحہ عمل طے کریں گے۔'

انہوں نے کہا کہ 'ہم بھارت کے حق میں ہمیشہ کھڑے ہیں اور ہم کسی بھی بھارت مخالف موقف کی حمایت نہیں کرتے ہیں۔ یہ قوم پرست، سیکولر اور جمہوری پارٹی ہے جو جموں خطے میں تمام لوگوں کو تمام مذہبی جماعتوں سے اکٹھا کرتی ہے۔'

انہوں نے کہا 'ان لوگوں کے لیے ہماری پارٹی میں کوئی جگہ نہیں ہے جو ملک دشمن ایجنڈے کی حمایت کرتے ہیں'۔