ترال: صفائی ملازمین انتظامیہ سے نالاں

جموں و کشمیر کے پلوامہ ضلع کے ترال میں برسوں سے کام کررہے صفائی ملازمین انتظامیہ کے رویے سے نالاں ہیں، ان کا کہنا ہے کہ کووڈ میں مصیبت کے وقت ہم لوگ اپنے فرائض کو انجام دے رہے ہیں لیکن سرکار ہمیں نظر انداز کررہی ہے۔

کورونا وائرس کی لڑائی میں جہاں پوری وادی میں عام زندگی بدستور مفلوج ہوکر رہ گئی ہے اور کووڈ واریئرس دوسروں کی زندگی بنانے کے لیے آگے آ رہے ہیں۔ بلدیہ میں کام کررہے ملازمین جنہوں نے گزشتہ دو برسوں کے کووڈ زدہ حالات میں اپنے آپ کو وقف کیا اور صحت وصفائی کو برقرار رکھنے میں اہم رول ادا کیا، ان ملازمین کا الزام ہے کہ سرکار نے ان کو نظر انداز کیا ہے۔

میونسپل کمیٹی ترال میں کام کر رہے درجنوں ملازمین کا الزام ہے کہ وہ پچھلے چودہ برسوں سے محکمہ میں اپنی خدمات انجام دے رہے ہیں اور کورونا وائرس کے دوران بھی اپنے آپ کو وقف کیے ہوئے ہیں لیکن نہ جانے کیوں حکومت ان کی طرف توجہ دینے سے گریزکررہی ہے۔

ای ٹی وی بھارت سے بات کرتے ہوئے عبدالرشید نے بتایا کہ ہم لوگ گزشتہ چودہ برسوں کے دوران معمولی اجرتوں پر کام کررہے ہیں۔ گزشتہ دو برسوں سے جب ملک میں کورونا کی وجہ سے حالات پرآشوب ہوگئے ایسے وقت میں بھی ڈیوٹی انجام دے رہے ہیں لیکن نہ جانے کیوں ہماری طرف سرکار نگاہ کرم نہیں کر رہی ہے۔