تین منزلہ عمارت جل کر خاکستر

جموں و کشمیر کے ضلع ڈوڈہ کے دور دراز گاؤں کلہانڈ میں گیس سلنڈر پھٹنے سے تین منزلہ عمارت جل کر خاکستر ہوگئی۔

تفصیلات کے مطابق آتشزدگی کا یہ واقع آج دوپہر دو بجے کے قریب اُس وقت پیش آیا جب لوگ عید الفطر کا تہوار منا رہے تھے ۔

اسی دوران بلاک دالی ادھینپور کے کلہانڈ گاؤں میں اشرف علی نٹنو نامی ایک شخص کے رہائشی مکان میں گیس سلنڈر پھٹنے سے زور دار دھماکہ ہوا جس کے نتیجہ میں تین منزلہ عمارت میں آگ کے شعلہ بھڑک گئے اور دیکھتے ہی دیکھتے پوری عمارت جل کر راکھ کے ڈھیر میں تبدیل ہو گئی۔

فائر بریگیڈ کی سہولیات نہ ہونے کی وجہ سے مقامی لوگ آگ پر قابو پانے میں ناکام ہوئے ، تاہم آتشزدگی کے اس واقعہ میں کسی جانی نقصان کی اطلاع نہیں ہے۔

بتایا جا رہا ہے کہ گھر میں لاکھوں کی مالیت کا نقصان ہوا ہے ۔ آگ کی واردات کی خبر پھیلتے ہی پولیس جائے وقوعہ پر پہنچی اور کاروائی شروع کر دی ہے۔

متاثرہ کنبہ کو اب رہائش کے لئے کوئی انتظام نہیں ہے جس وجہ سے اُن کو رات کھلے آسمان تلے گزرانی پڑے گی ۔علاقہ دور دراز ہونے کی وجہ سے کوئی بھی امدادی سامان وہاں جلدی نہیں پہنچایا جا سکتا ہے ۔