بی ایس ایف میں تقرری کے لیے ہزاروں نوجوانوں کی شرکت

بی ایس ایف میں تقرری کے لیے صوبہ جموں اور ضلع اننت ناگ کے نوجوان کافی پر جوش نظر آ رہے ہیں۔ وہ اس کے لیے انتھک جدوجہد اور محنت کرتے بھی دکھائی دے رہے ہیں۔

جموں کے 19000 سے زائد نوجوانوں نے بی ایس ایف میں بھرتی کے لیے درخواست دے کر اپنے جوش و خروش کا مظاہرہ کیا۔

مرکز کے زیر انتظام علاقہ جموں و کشمیر کے جموں کے پلوڈہ بی ایس ایف ہیڈ کوارٹر میں جاری بی ایس ایف کی بھرتی کے لیے 19000 سے زائد نوجوانوں نے رجسٹریشن کرایا ہے۔

بی ایس ایف میں بھرتی کے لیے پہلے روز اتوار کو منعقدہ بھرتی ریلی میں تقریباً تین ہزار نوجوان فزیکل ٹیسٹ میں شامل ہوئے۔

فوج کی جانب سے بھرتی کے لیے جموں کے ساتھ ساتھ سانبہ اور کٹھوعہ اضلاع میں بھی بھرتی مہم چلائی جا رہی ہے۔ بھرتی میں شامل ہونے والے نوجوان بھی پر جوش نظر آ رہے ہیں۔

اس بھرتی کے انچارج افسر گیاندر سنگھ نے کہا کہ 'اس بھرتی کا مقصد جموں و کشمیر کے نوجوانوں کو روزگار فراہم کرنا ہے'۔

انہوں نے مزید کہا کہ 'اس بھرتی میں کثیر تعداد میں نوجوان شامل ہو رہے ہیں اور 19000 نوجوانوں نے رجسٹریشن کروایا ہے'۔

انہوں نے کہا کہ 'بھرتی کا عمل مکمل شفافیت کے ساتھ جاری ہے اور بھرتی میں شرکت کرنے والوں کو کسی بھی دلال کو پیسہ نہیں دینا چاہیے کیونکہ بھرتی کے عمل میں مکمل شفافیت ہے اور آخری سلیکشن صرف فزیکل، تحریری اور طبی ٹیسٹ کے بعد کیا جائے گیا'۔