گاندربل میں لاک ڈاؤن کا سختی سے نفاذ

گاندربل میں انتظامیہ کی جانب سے نافذ لاک ڈاؤن کو آج مزید سخت کر دیا گیا ہے۔ حالانکہ کورونا کرفیو کے نفاذ کے باعث گزشتہ روز شہر میں جمعہ کی نماز بھی ادا نہیں کی گئی۔

جموں و کشمیر کے ضلع گاندربل میں مرحوم میر واعظ مولوی محمد فاروق اور مرحوم عبدالغنی لون کی برسی کے موقع پر آج کورونا کرفیو کو مزید سخت کر دیا گیا ہے۔ حالانکہ کورونا کرفیو کے نفاذ کے باعث گزشتہ روز جمعہ کی نماز بھی ادا نہیں کی گئی۔

گزشتہ روز نصف درجن سے زائد مساجد کے محراب و منبر خاموش رہے، انتظامیہ کی جانب سے شہر کی طرف جانے والی تمام سڑکوں پر سیکورٹی فورسز کو تعینات کیا گیا تھا۔

گاڑیوں میں سفر کرنے والے اور پیدل چلنے والے لوگوں کو مختلف جگہوں پر لگے ناکوں پر روکا جارہا ہے اور انہیں پوچھ تاچھ کے بعد ہی جانے کی اجازت دی جا رہی ہے۔

سرکاری ذرائع کے مطابق کشمیر زون پولیس کے انسپکٹر جنرل وجے کمار نے گذشتہ روز تمام ایس ایس پیز اور ڈی آئی جی کے ساتھ میٹنگ کر کے تازہ سیکورٹی صورتحال کا جائزہ لیا تھا۔میٹنگ میں طے پایا تھا کہ 21 مئی کے دن کورونا کرفیو کو مزید سخت کیا جائے گا۔