جموں و کشمیر کے دارالحکومت سرینگر میں کووڈ 19 کیسز میں ہر روز تیزی سے اضافہ ہورہا ہے اور یہ ضلع جموں و کشمیر کا پہلا شہر بن گیا ہے جس میں 10،000 سے زیادہ کیس رپورٹ ہوئے ہیں۔
جموں وکشمیر میں کورونا کے کل مثبت معاملات میں سے سرینگر ضلع میں 23 فیصد ہے۔ اتوار کے روز سرینگر میں 185 نئے کورونا مثبت معاملات سامنے آئے ہیں جس سے ضلع میں مثبت کیسوں کی مجموعی تعداد 10،165 ہوگئی ہے۔
حکام کے مطابق ضلع سرینگر میں بھی سب سے زیادہ اموات کی اطلاع ملی ہے ۔یہاں کووڈ کی وجہ سے فوت ہونے والے افراد کی تعداد 240 ہے۔ جموں و کشمیر میں کووڈ 19کی وجہ سے 804 اموات ہوچکی ہے۔ جموں و کشمیر میں ہونے والی کل اموات کا 30 فیصد سرینگر میں پیش آیا ہے۔
ضلع انتظامیہ نے کورونا کے بڑھتے کیسز کے پیش نظر شہر میں پابندیاں عائد کردی تھیں اس کے بعد لاک ڈاؤن کو 16 اگست سے ختم کردیا گیا تھا۔
سرکاری اعداد و شمار کے مطابق 15 اگست کو سری نگر میں کووڈ 19 مثبت معاملات کی تعداد 6790 تھی جو 6 ستمبر کو بڑھ کر 10،165 ہوگئی ہے۔
واضح رہے کہ گزشتہ روز جموں و کشمیر میں ناول کورونا وائرس کے 1316 مثبت معاملے درج کئے گئے جن میں 100 مسافر بھی شامل ہیں۔ ان معاملات کے ساتھ ہی جموں و کشمیر میں کووڈ-19 کے متاثرین کی تعداد 43557 ہوگئی جبکہ اس وبا سے فوت ہونے والوں کی تعداد 784 ہو گئی ہے۔
