سرینگر میونسپل کارپوریشن کے ڈپٹی میئر پرویز احمد قادری نے ای ٹی وی بھارت سے بات کرتے ہوئے کہا کہ 'کیا وجہ ہے کہ کل میئر کے خلاف فلور ٹیسٹ ہونے جارہا ہے اور اس کے پیچھے کیا وجوہات ہیں۔'
انہوں نے اس بات کا جواب دیتے ہوئے کہا کہ 'در اصل کارپوریٹرز کو آج تک وہ اہمیت نہیں دی گئی اور نہ ہی ان کی بات کبھی سنی گئی۔'
انہوں نے بتایا کہ 'جو کارپوریٹرز، ایس ایم سی سے جڑے ہیں انہوں نے الیکشن میں حصہ لے کر کامیابی حاصل کی لیکن بعد میں میئر کی جانب سے انہیں وہ اہمیت نہیں دی گئی نہ ہی ان کے مشوروں کو کبھی زیر غور لیا گیا۔'
انہوں نے مزید بتایا کہ 'ایس ایم سی سے جڑے تمام کارپوریٹرز کو نظر انداز کیا گیا اور یہی وجہ ہے کہ وہ آج میئر کو دیا گیا اعتماد واپس لینے کے لیے مجبور ہوئے۔'
پرویز احمد قادری کا کہنا تھا کہ 'ایس ایم سی کے کارپوریٹرز نے اس سے قبل ڈپٹی میئر شیخ عمران کے خلاف بھی عدم اعتماد کا اظہار کیا تھا اور آج وہ میئر جنید متو کے خلاف "ووٹ آف نو کانفڈنس" پیش کرنے جارہے ہیں۔'
انہوں نے بتایا کہ 'اس حوالے سے تمام تیاریاں مکمل ہوچکی ہیں اور کل بینکٹ ہال سرینگر میں اس سلسلے میں فلور ٹیسٹ ہونے جا رہا ہے جس میں یہ صاف ظاہر ہوگا کہ میئر کے حق میں کون ہیں اور کون نہیں۔'
انہوں نے کہا کہ 'سرینگر میونسپل کارپوریشن میں اکثر ایسی ہی کشیدگی چلتی رہی جس کے سبب میونسپل کے کام کاج میں بھی کافی رکاوٹیں حائل ہوگئیں۔
انہوں نے بتایا کہ 'کارپوریٹرز کی بات کسی بھی معاملے میں نہیں سنی گئی اور انہیں نظر انداز کیا گیا جس کی وجہ سے یہ دوسرا موقع ہے کہ وہ عدم اعتماد کی درخواست پہ اتر آئے اور میئر کے مخالف کھڑے ہوگئے۔'
