اطلاعات کے مطابق آئے روز اس طرح کی خبریں مقامی ذرائع سے موصول ہو رہی ہیں کہ کئی نوجوان کسی سامان کے لیے یا کسی کام کے سلسلے میں گھر سے نکل رہے ہیں اور پھر گھر واپس نہیں آتے ہیں۔
ایسے نوجوانوں کے اہل خانہ نے عام لوگوں سے اپیل کی ہے کہ وہ ان کے بچوں کا سراغ لگانے میں ان کی مدد کریں۔
وہیں موصولہ اطلاعات کے مطابق آج بھی ریڈونی (گھاٹ) کا رہنے والا 21 سالہ نوجوان شاکر احمد اتو ولد عبد الرحمن لاپتہ ہوگیا ہے جس کی وجہ سے ان کے گھروالے کافی پریشان ہیں۔
اس دوارن سماجی رابطے کی ویب سائٹز کے ذریعے شاکر کا فوٹو اسلحہ سمیت نظر آیا تو یہ خدشہ ظاہر ہوتا ہے کہ اس نے عسکریت تنظیم میں شمولیت اختیار کر لی ہے۔
شاکر کے اہل خانہ کا کہنا ہے کہ 'ہمیں 10 مارچ سے اس کے بارے میں کوئی اطلاع نہیں ہے۔ ہم نے اسے ہر ممکن جگہ پر تلاش کیا لیکن اس کا پتہ لگانے میں ناکام رہے لیکن آج جب شاکر کا فوٹو سماجی رابطے کی ویب سائٹ فیس بک پر آیا تو ہم حیران ہو گئے۔'
وہیں وقار احمد بٹ ولد بشیر احمد بٹ ساکنہ چولگام کولگام گزشتہ کئی دنوں سے لاپتہ ہے اگرچہ مقامی اوقاف کمیٹی نے ان کے لاپتہ ہونے کی خبر کو لے کر پولیس اسٹیشن کولگام میں ایک رپوٹ بھی درج کی ۔تاہم کافی دن گزر جانے کے باوجود ان کی کوئی خبر نہیں ہے۔
اہل خانہ کے مطابق وقار گھر سے کسی کام کے سلسلہ میں نکلا اور کافی دن گزر جانے کے باوجود ابھی گھر واپس نہیں آیا۔
ان کے ایک دوست عامر احمد نے ای ٹی وی بھارت کے نمائندے سے بات کرتے ہوئے کہا کہ 'ہم نے ایک نئے مکان کی پینٹنگ کا کام ہاتھ میں لیا تھا اور روز کی طرح میں نے انہیں کام پر آنے کو کہا لیکن کام پر نہ آنے کی وجہ آج تک پتہ نہیں چلی اور ان کے دوست کے ساتھ ساتھ ان کے اہل خانہ کافی فکر مند ہیں۔'
انہوں نے مقامی لوگوں سے اپیل کی کہ وہ انہیں اس کے بارے میں خبر کریں۔ اُدھر پولیس ترجمان کے مطابق ضلع میں چار نوجوانوں کے لاپتہ ہونے کی رپوٹ درج کی گئی ہے۔
