چوبیس گھنٹوں تک جاری رہنے والا آپریشن ختم

سامبورہ پلوامہ میں رات بھر جاری رہنے والا سرچ آپریشن ختم ہوگیا، اس دوران دوعسکریت پسند ہلاک ہوگئے جبکہ ایک فوجی اہلکار زخمی ہوئے۔

جموں وکشمیر کے سامبورہ پلوامہ میں چوبیس گھنٹوں تک جاری رہنے والا آپریشن اختتام پذیر ہوگیا۔ اس دوران فوج اور عسکریت پسندوں کے مابین مسلح تصادم میں لشکر طیبہ تنظیم سے وابستہ دو عسکریت پسند ہلاک ہوئے جب کہ ایک فوجی اہلکار بھی زخمی ہوگیا۔

مقامی ذرائع کے مطابق ہلاک ہونے والے عسکریت پسندوں کا تعلق ضلع پلوامہ کے ترال اور سامبورہ سے ہے تاہم پولیس نے ابھی تک ان کی شناحت نہیں کی ہے۔

تصادم کے دوران بشیر احمد اور غلام محمد کے مکانوں کو جزوی نقصان پہنچا ہے۔

تصادم کے جگہ پر 4 میگزین کے ساتھ دو اے کے 47 رائفلیں ، 10 راؤنڈ گولیاں اور 2 پاؤچز برآمد ہوئے۔