سنیچر کی رات کو دیر گئے پورے علاقے میں سنسنی پھیل گئی جب ایک رہائشی مکان آتشزدگی کی نذر ہوگیا۔ ہاکبارہ کے کوسم باغ نامی علاقے میں آتشزدگی کی اس واردات میں مذکورہ بستی کے ایک رہائشی خضر محمد کا پورا مکان جل کر تباہ ہوگیا ہے۔
اس موقع پر فائر اینڈ ایمر جنسی عملے نے کارروائی کرتے ہوئے آگ پر قابو پالیا اور اسے مزید پھیلنے سے بچا لیا۔
معلوم ہوا ہے کہ سنیچر دیر رات گئے مذکورہ علاقے میں جب اس رہائشی مکان سے اچانک آگ نمودار ہوئی تو آگ نے آناً فاناً پورے مکان کو اپنی لپیٹ میں لیا۔
عینی شاہدین کے مطابق آگ اس قدر بھیانک تھی کہ اس کے شعلے دور دور تک دکھائی دے رہے تھے۔ آگ نے بھیانک رخ اختیار کیا اور مکان کو مکمل طور سے راکھ میں تبدیل کردیا تاہم بعد میں فائر اینڈ ایمر جنسی کی ٹیم پہنچی اور انہوں نے آگ بجھانے کے ساتھ ساتھ اس کو مزید پھیلنے سے بھی روکا۔
ادھر مذکورہ کنبہ مکمل طور پر بے گھر ہوگیا ہے اور ان کی لاکھوں روپے مالیت کی املاک راکھ کے ڈھیر میں تبدیل ہوئی۔پولیس اور انتظامیہ اپنی جانب سے آگ کی وجہ دریافت کررہی ہے اور اس میں مزید تفصیلات کا انتظار ہے۔
