سبھی سیاسی قیدیوں کو رہا کیا جائے: فاروق عبداللہ

فاروق عبداللہ کا کہنا تھا کہ جموں وکشمیر میں سیاسی سرگرمیاں بحال تب ہی ہو سکتی ہیں جب تمام سیاسی و غیر سیاسی قیدیوں کو رہا کیا جائے گا۔

نیشنل کانفرنس کے صدر اور رکن پارلیمان فاروق عبداللہ نے انکے فرزند عمر عبداللہ کی آٹھ ماہ کی قید سے رہائی پر مسرت کا اظہار کیا اور اُمید ظاہر کی کہ سبھی سیاسی و غیر سیاسی قیدیوں کو بھی رہا کیا جائے گا۔

نیشنل کانفرنس کے ترجمان کے مطابق فاروق عبداللہ کا کہنا تھا کہ انکے فرزند کی رہائی ایک خوشی کا مقام ہے۔

فاروق عبداللہ کا کہنا تھا کہ جموں وکشمیر میں سیاسی سرگرمیاں بحال تب ہی ہو سکتی ہیں جب تمام سیاسی و غیر سیاسی قیدیوں کو رہا کیا جائے گا۔

غور طلب ہے کہ جموں و کشمیر کے سابق وزیر اعلیٰ اور نیشنل کانفرنس کے نائب صدر عمر عبداللہ کو انتظامیہ نے آج آٹھ ماہ کی حراست کے بعد رہا کیا۔

انکو گزشتہ برس پانچ اگست کو دفعہ 370 منسوخ کرنے کے بعد انتظامیہ نے ہری نواس سب جیل میں حراست میں رکھا تھا اور چند ہفتوں کے بعد ان پر پبلک سیفٹی ایکٹ عائد کیا تھا۔