ضلع ترقیاتی کمشنر شوپیان چودھری محمد یاسین نے گورنمنٹ پرائمری ہیلتھ سینٹر پنجورہ میں عوامی دربار کا اہتمام کیا۔
اس عوامی دربار میں پنجورہ اور اس کے ملحقہ علاقوں سے آئے سیول سوسائٹی ممبران و دیگر وفود نے اپنے مطالبات و مسائل ضلع انتظامیہ کی نوٹس میں لائے۔
لوگوں نے اپنے علاقوں کے مسائل ترقیاتی کمشنر کے سامنے رکھے جس میں پینے کے پانی کی قلت، بجلی، سڑکوں کی خستہ حالی، اسٹریٹ لائٹس اور علاقوں میں کوڑا کرکٹ جمع کرنے کے لئے ڈسٹ بن لگوانے وغیرہ شامل ہے۔
ترقیاتی کمشنر شوپیان نے بتایا کہ 'ترجیحی بنیادوں پر علاقے کے ہر گھر کو پینے کے صاف پانی کی فراہمی کو یقینی بنایا جائےگا۔ آر اینڈ بی کو ہدایت دی ہے کہ سڑک کی چوڑائی اور میکڈیمائزیشن پر جلد کام شروع کیا جائے'۔ اس دوران ترقیاتی کمشنر نے بتایا کہ 'ضلع بھر میں صحت کی بہتر سہولیات کو یقینی بنانے کے لیے ٹھوس اقدامات اٹھائے جا رہے ہیں'۔
انہوں نے بہتر عوامی ٹرانسپورٹ سسٹم پر زور دیتے ہوئے مقامی نوجوانوں پر زور دیا کہ وہ ضلعی انتظامیہ سے اس سلسلہ میں رابطہ کریں تاکہ سبھی علاقوں میں کیب سروس شروع کی جا سکے۔
اس موقع پر ایگزیکٹو انجینئرز، تحصیلدار صاحبان اور دیگر افسران بھی موجود تھے
