ضلع ڈوڈہ بجلی کی عدم دستیابی کے خلاف احتجاجی مظاہرہ کیا گیا۔ اس موقع پر احتجاجی مظاہرین کا کہنا تھا کہ موجودہ جدید دور میں لوگ ڈیجیٹل سہولیات کا فائدہ اُٹھا رہے ہیں لیکن گویلہ پنچایت کے بنی گاؤں میں لوگ ابھی بھی بنیادی سہولیات کے منتظر ہیں۔
لوگوں کا کہنا ہے کہ شام کو سورج کے غروب ہونے کے بعد گھر سے باہر نکلنا مشکل ہوجاتا ہے۔ رات کی تاریکی میں گاؤں گھپ اندھیرے میں ڈوب جاتا ہے۔ تاریکی کی وجہ سے لاک ڈاؤن کے دوران بچّوں کی تعلیم شدید طور متاثر ہو رہی ہے۔
گاؤں کے مقامی باشندہ رحمت اللہ میر، مختیار احمد، گلشن احمد کا کہنا ہے کہ متعدد بار محکمہ بجلی سے گاؤں میں بجلی فراہم کرنے کا مطالبہ کیا گیا لیکن اب تک اس سلسلہ میں کوئی عملدرآمد نہیں ہوا ہے۔
واضح رہے کہ ضلع ڈوڈہ میں آزادی کے 70 برس گزر جانے کے بعد بھی درجنوں کی تعداد میں ایسے دیہات ابھی موجود ہیں جہاں برقی رو سے لوگ روبرو نہیں ہوئے ہیں۔ اگر چہ ضلع ڈوڈہ میں لوگوں کو سولار لائٹ کے ذریعہ ضلع کے تمام علاقوں کو بجلی سے جوڑا ہوا دکھایا جاتا ہے لیکن حقیقت اس کے بلکل برعکس ہے۔
