دودھ کی پیکنگ کرنے والی نجی کمپنیز نے فی لیٹر دودھ میں از خود دو روپے کا اضافہ کیا ہے جس کے سبب اب بازاروں میں فی لیٹر دودھ 42 روپے میں دستیاب ہے۔
صارفین کے مطابق مرغ فروشوں نے بے تحاشا اضافہ کرکے فی کلو مرغ کی قیمت 150 روپے کردی ہے اور میوہ فروش بھی اپنی مرضی کے مطابق میوہ فروخت کررہے ہیں۔
صارفین کی شکایت ہے کہ انتظامیہ نے جہاں عوام کی معمول کی زندگی میں گذشتہ 81 دنوں سے کئی مشکلات پیدا کی ہیں، وہیں انتظامیہ اور محکمہ امور صارفین نے اشیاء خوردنی کی قیمتوں کو لے کر دکانداروں اور دیگر مختلف کمپنیز کے سامنے ہتھیار ڈال دیے ہیں۔
اس حوالے سے ای ٹی وی بھارت سے بات کرتے ہوئےکشمیر کے محکمہ امور صارفین کے ڈائریکٹر محمد قاسم وانی نے کہا کہ 'دودھ سبزی اور مرغ کی قیمتوں میں اضافہ کرکے تاجروں نے قانون کی خلاف ورزی کی ہے۔'
انہوں نے کہا کہ 'محکمہ بازاروں میں گراں فروشی کو روکنے کے لیے مختلف ٹیمز روانہ کرکے قانون کی خلاف ورزی کرنے والے تاجروں اور سبزی فروشوں کے خلاف کارروائی عمل میں لائے گا۔'
عوام کی شکایت ہے کہ دارالحکومت سرینگر میں محکمہ امو ر صارفین کی ناک کے نیچے اس قدر گراں فروشی کا بازار گرم ہے وہیں وادی کے دیگر قصبوں میں بھی حالات اس سے ابتر ہیں۔
