ملازمین کو برطرف کیے جانے پر انتظامیہ کے خلاف احتجاج

سنہ 2014 میں محکمہ صحت میں بھرتی ہوئے ملازمین کو انتظامیہ کی جانب سے برطرف کیے جانے کے خلاف میڈیکل ایمپلائز فیڈریشن نے پرنسپل گورنمنٹ میڈیکل کالج اور انتظامیہ کی شدید نکتہ چینی کی۔

میڈیکل ایمپلایز فیڈریشن کی جانب سے سرینگر میں ایک پریس کانفرنس کا انعقاد کیا گیا جس میں فیڈریشن کے صدر شبیر احمد لنگو نے سنہ 2014میں محکمہ صحت میں بھرتی ہوئے ملازمین کو برطرف کیے جانے پر انتظامیہ کی نکتہ چینی کی۔

پریس کانفرنس کے دوران انکا کہنا تھا کہ برطرف کیے گئے ملازمین نے عالمی وبا کوروناوائرس اور دیگر نامساعد حالات کے دوران ہمیشہ دیگر طبی عملہ کے شانہ بہ شانہ کام کرکے اپنے فرائض منصبی انجام دیے۔فیڈریشن کے صدر کا کہنا تھا کہ ’’ایک جانب انتظامیہ عوام کو نوکریاں اور روزگار فراہم کرنے کے بلند و بانگ دعوے کیے جاتے ہیں وہیں دوسری جانب پڑھے لکھے اور محنت کش نوجوانوں کو بے روزگار کیا جا رہا ہے۔‘‘انہوں نے اس فیصلے کی مذمت کرتے ہوئے کہا کہ ’’چھ سال تک دن رات محکمہ میں بحسن خوبی اپنی ڈیوٹی انجام دینے والے افراد آج اپنے مستقبل اور اہل و عیال کی فکر میں کسمپرسی کی زندگی گزار رہے ہیں۔‘‘انہوں نے لیفٹینٹ گورنر انتظامیہ سے پر زور اپیل کرتے ہوئے SRO 384,409کے تحت بھرتی کیے گئے ملازمین کے معطلی کے حکمنامے کو منسوخ کرنے کے علاوہ انہیں محکمہ میں مستقل کیے جانے کی بھی مانگ کی۔