پاکستان اور بھارت کی افواج کے مابین گزشتہ کئی روز سے لائن آف کنٹرول کے دونوں اطراف فائرنگ اور گولہ بارہ کا سلسلہ جاری ہے۔
اتوار کی دوپہر اس گولہ باری میں اس وقت شدت آگئی جب پاکستانی آرٹلری نے بھارتی چوکیوں کو نشانہ بنایا۔
اس گولہ باری میں ایک فوجی شدید زخمی ہو گیا، جسے فوری طور علاج کے لئے مقامی اسپتال میں داخل کیا گیا۔
فوجی ذرائع کے مطابق 'علاج کے دوران اس فوجی کی موت واقع ہو گئی۔ مارے گئے فوجی کی شناخت سنتوش لال کے طور ہوئی ہے جو ریاست جھارکھنڈ کے مارمالا گاؤں سے تعلق رکھتے تھے۔
اطلاعات کے مطابق سنتوش لال، اپنے کنبے کا واحد کماؤ تھا اور دیوالی کی چھٹیاں منانے کے لئے چند دنوں کے اندر روانہ ہونے والا تھا۔
بھارتی فوج نے جوابی کارروائی میں کئی پاکستانی چوکیوں کو نشانہ بنایا۔ سرحد پار ہوئے نقصانات کے بارے میں اطلاعات نہیں ہیں۔
معلوم ہوا ہے کہ اوڑی کے ہتھ لنگہ علاقے کے علاوہ کپوارہ اضلاع کے کیرن اور ترہگام علاقوں میں بھی گولہ باری ہوئی ہے۔
گزشتہ ماہ بھی اوڑی سیکٹر میں شدید گولہ باری کے نتیجے میں فوج کے ساتھ کام کرنیوالے دو مزدور شدید زخمی ہوئے تھے۔ جن میں اشتیاق احمد نامی مزدور کی بعد میں موت ہو گئی تھی۔ یہ واقعہ کمل کوٹ علاقے میں نانک پوسٹ پر سمتبر کو پیش آیا تھا۔
