شمالی کشمیر کے ضلع بانڈی پورہ میں کچھ عرصہ قبل ضلع ہسپتال کو نئی عمارت میں منتقل کرنے کے بعد پرانے ہسپتال کی عمارت کو خالی کرکے چھوڑ دیا گیا تھا، جس کی وجہ سے ہسپتال کی مختلف عمارتوں کے در و دیوار ٹوٹنے لگے ہیں۔
ہسپتال کی پرانی عمارت کی دیکھ ریکھ نہ ہونے پر مقامی افراد نے ہسپتال حکام کے خلاف سخت برہمی کا اظہار کیا ہے۔
یہاں یہ بات قابل ذکر ہے کہ اس وقت ہسپتال کی پرانی عمارت کے ایک حصے میں میڈیکل بورڈ کی جانب سے ہفتہ روزہ کام ہوتا ہے۔
مقامی لوگوں نے پرانی عمارت میں بی ایم او، ڈپٹی سی ایم او اور دیگر دفاتر منتقل کئے جانے کا مطالبہ کیا ہے تاکہ عمارت کی دیکھ ریکھ ہو سکے اور اسے منہدم ہونے سے بچایا جا سکے۔
ادھر اے سی آر بانڈی پورہ ریاض احمد بیگ کا کہنا ہے کہ عمارت میں بی ایم او اور دوسرے دفاتر منتقل کئے جائیں گے اور اس حوالے سے بہت جلد احکامات جاری کئے جائیں گے۔
