اننت ناگ: جیل میں کورونامتاثرین کی تعداد میں اضافہ

ڈسٹرکٹ جیل اننت ناگ میں کورونا وائرس متاثرہ قیدیوں کی تعداد میں مسلسل اضافہ ہو رہا ہے۔

دراصل 11 جولائی کو مذکورہ جیل میں قید جے کے ایل ایف کے بانی محمد مقبول بٹ کے چھوٹے بھائی ظہور احمد بٹ کا کووڈ 19 ٹیسٹ مثبت آگیا تھا، جس کے بعد جیل حکام نے اسٹاف سمیت قیدیوں کے جانچ نمونے اکٹھا کرنا شروع کیے۔

جن میں سے پہلے انتالیس اور آج مزید 52 قیدیوں کا ٹیسٹ مثبت آگیا ہے، جس کے ساتھ ہی کووڈ 19 مثبت قیدیوں کی مجموعی تعداد 96 تک پہنچ گئی ہے۔

واضح رہے کہ ڈسٹرکٹ اننت ناگ میں صرف80 قیدیوں کو رکھنےکی گنجائش ہے جبکہ اس میں 192 قیدیوں کو قید رکھا گیا ہے۔

جیل میں مہلک وبا پھیلنے کی وجہ سے قیدیوں کے افراد خانہ پریشانی میں مبتلا ہوئے ہیں۔ جیل میں بھیڑ بھاڑ اور احتیاطی تدابیر کے فقدان کے حوالہ سے وہ اپنے قیدیوں کو لے کر کافی فکر مند ہو گئے ہیں۔

ادھر مذکورہ جیل کے سپرانٹنڈنٹ سہروز احمد کا کہنا ہے کہ متاثرہ قیدیوں کو ہائی گراونڈ منتقل کیا جا رہا ہے جہاں ان کے لئے عارضی طور ویلنیس سینٹر قائم کیا گیا ہے تاکہ انہیں معقول پروٹوکول کے اندر بہتر علاج و معالجہ فراہم کیا جائے۔