وسطی کشمیر کے ضلع گاندربل میں نیشنل ووٹرز ڈے کے سلسلے میں تقریبات مختلف مقامات، بلاک دفاتر اور دیگر سرکاری اداروں میں منعقد کی گئیں جبکہ سب سے بڑی تقریب منی سیکرٹریٹ گاندربل میں منعقد ہوئی جس میں ضلعی الیکشن آفیسر شفقت اقبال جو کہ ضلع کے ترقیاتی کمشنر بھی ہے مہمان خصوصی تھے۔
اس موقع پر ضلع ترقیاتی کمشنر شفقت اقبال نے نوجوانوں میں ووٹر لسٹ میں اندراج کو یقینی بنانے کی ضرورت پر زور دیا۔
اجتماع سے خطاب کرتے ہوئے ڈسٹرکٹ الیکشن آفیسر نے اس دن کی اہمیت کو اجاگر کیا اور شرکا کو ووٹ کی اہمیت سے آگاہ کیا۔ انہوں نے لوگوں پر زور دیا کہ وہ ووٹر لسٹوں میں ان نوجوانوں کی رجسٹریشن کو یقینی بنائیں جو انتخابی عمل میں فعال شرکت کے لئے 18 سال کی عمر حاصل کرچکے ہیں۔
ڈسٹرکٹ الیکشن آفیسر نے متعلقہ افسران پر زور دیا کہ وہ مشن موڈ پر کام کریں تاکہ زیادہ سے زیادہ لوگ جمہوری عمل میں حصہ لے سکیں۔
قبل ازیں ضلعی الیکشن آفیسر نے شرکاء میں ووٹرز کا عہد کیا اور نئے ووٹرز میں ووٹر کارڈ تقسیم کیے۔
تقریب میں اے ڈی سی گاندربل فاروق احمد بابا ، اے سی آر، چیف پلاننگ آفیسر، ڈپٹی ڈسٹرکٹ الیکشن آفیسر اور دیگر متعلقہ عہدیداران کے علاوہ مختلف تعلیمی اداروں کے طلباء نے شرکت کی۔
سب ڈویژن کنگن سمیت ضلع کے دیگر بلاکس میں بھی قومی ووٹرز ڈے منایا گیا۔
