مقامی لوگوں نے ناراضگی کا اظہار کرتے ہوئے کہا کہ دماغی طور سے معذور شخص گذشتہ تین روز سے ایک پل کے نیچے زخمی حالت میں پڑا ہوا تھا لیکن ضلع انتظامیہ اور پولیس کی لاپروائی کی وجہ سے اس کا علاج نہیں کیا گیا۔
انہوں نے کہا کہ گذشتہ روز اس شخص کو نامعلوم گاڑی نے ٹکر مار کر زخمی کر دیا تھا۔ اس کے بعد مقامی لوگوں اور رضاکاروں نے انہیں ہسپتال داخل کیا تھا۔ ہسپتال میں ابتدائی علاج کے بعد اسے واپس پل کے نیچے چھوڑ دیا گیا تھا۔
جب آج ان کی طبیعت بگڑتی گئی تو میڈیا کے نمائندوں کی مداخلت اور رضاکاروں کی مدد سے دوبارہ انہیں ضلع ہسپتال میں داخل کروایا گیا۔
میڈیکل سپرنٹنڈنٹ رامبن ڈاکٹر جے پی سنگھ نے اس بات کی تصدیق کرتے ہوئے کہا کہ معذور شخص کو ہسپتال میں داخل کرواگیا ہے۔ اس کے علاج کے لیے ہر ممکن کوشش کی جائے گی اور اس کو ادویات وغیرہ مفت دی جائے گی۔
مقامی لوگوں نے ایسے بے سہارا معذور افراد کے لیے ہسپتال میں مخصوص وارڈ بنانے کا مطالبہ کیا ہے۔
