پی ڈی پی صدر محبوبہ مفتی نے آج مڈہامہ کپواڑہ جا کر سرینگر میں ہلاک ہونے والے کپواڑہ کے پولیس اہلکار کےگھر جا کر غمزدہ خاندان سے تعزیت کی۔
ساتھ ہی لواحقین کو ہمت دلایا اور اس واقعہ پر افسوس کا اظہار کرتے ہوئے واقعہ کی شدید مذمت کی۔ انہوں نے کہا کہ خون خرابہ روکنے کے لیے بھارت اور پاکستان کو بات چیت کا عمل شروع کرنا چاہیے تاکہ پر امن حالات پیدا ہوسکیں۔
انہوں نے افسوس کا اظہار کرتے ہوئے کہا کہ مرکزی حکومت ٹس سے مس نہیں ہورہی ہے انہیں کوئی فکر نہیں ہے۔ ان کا مزاج یہ ہے کہ لوگ مرتے ہیں مرنے دو۔
حکومت کی بے توجہی کی وجہ سے جموں و کشمیر میں جنگ جیسی صورتحال پیدا ہوجاتی ہے۔ ان باتوں کا اظہار محبوبہ مفتی نے آج کپواڑہ میڈیا نمائندوں کے ایک سوال کے جواب میں کیا۔
انہوں نے کہا کہ سرکار کو چاہئے وہ بھارت کے سابق وزیر اعظم آنجہانی اٹل بہاری واجپئی پاکستان کے سابق صدر پرویز مشرف کی پالیسی اپنائیں۔
جب جب ان دونوں رہنماؤں کے درمیان بات چیت ہوتی تھی جموں و کشمیر میں خون خرابے میں کمی آتی تھی۔
