وزیر اعظم نریندر مودی نے 25 دسمبر کو وزیر اعظم کسان سمّان نیدھی کے تحت اگلی قسط کے طور پر 18000 کروڑ روپئے کی امدادی رقم اجراء کی جس سے 9 کروڑ کسان خاندانوں کو فائدہ پہنچا۔
وزیر اعظم نے کہا 'جب سے یہ اسکیم شروع ہوئی ہے 1 لاکھ 10 ہزار کروڑ روپے سے زیادہ کاشتکاروں کے کھاتے تک پہنچ چکے ہیں۔'
اس موقع کی مناسبت سے کسان مرکز جموں میں بیک وقت ایک پروگرام منعقد کیا گیا جس میں لیفٹیننٹ گورنر منوج سنہا نے کسانوں سے خطاب کیا۔
لیفٹیننٹ گورنر نے اس موقع پر کہا کہ جموں و کشمیر کے کسانوں کو اسکیم کے تحت 1132 کروڑ روپئے کی مالی امداد فراہم کی گئی ہے۔ انہوں نے واضح کیا کہ کسانوں کی فلاح و بہبود اور ان کے ذریعہ معاش کی بہتری حکومت کی اولین ترجیحات میں شامل ہے۔
انہوں نے کہا کہ جموں و کشمیر میں زراعت اور اس سے وابستہ شعبوں کی ترقی کے لئے جامع اقدامات اٹھائے گئے ہیں۔ انہوں نے مزید کہا کہ جموں و کشمیر میں وزیر اعظم کسان سمان نیدھی کے تحت 100 فیصد کوریج کو یقینی بنایا گیا ہے تاکہ اس اسکیم کا فائدہ سبھی کسانوں کو پہنچے۔
لیفٹیننٹ گورنر نے کہا کہ زراعت، باغبانی، ڈیری اور پولٹری کے شعبوں کو فروغ دینا ہماری ترجیحات ہیں اور انتظامیہ ان شعبوں کی ترقی کے لئے ہر اقدام اٹھا رہی ہے۔
