گاندربل: مرکز کے زیر انتظام یوٹی جموں و کشمیر کے ضلع گاندربل سمیت مختلف اضلاع میں برفباری کا سلسلہ جاری ہے۔ مسلسل برفباری کی وجہ سے عام زندگی مفلوج ہو کر رہ گئی ہے۔
ذرائع کے مطابق ضلع گاندربل کے مشہور سیاحتی مقام سونہ مرگ میں تازہ برف باری کے بعد سرینگر لیہہ شاہراہ پر گاڑیوں کی آمدورفت بند کردی گئی ہے۔ قومی شاہراہ پر آمد و رفت بند کئے جانے کے بعد ٹریفک نظام پوری طرح سے متاثر ہوگئی ہے۔
ایک اہلکار نے بتایا کہ سڑک پر پھسلن کو دیکھتے ہوئے اسے عارضی طور پر بند کردیا گیا ہے۔ تفصیلات کے مطابق، سونہ مرگ میں کل شام کو شدید برف باری کا سلسلہ جاری ہوا تاہم گاندربل کے دیگر علاقوں میں کسی جگہ بھی بارش یا برفباری کی کوئی اطلاع موصول نہیں ہوئی ہے، وہیں وادی کے بیشتر حصوں میں درجہ حرارت مسلسل نقطہ انجماد سے نیچے ہی درج کیا جا رہا ہے۔
یہ بھی پڑھیں:Mughal Road Closed : پہاڑی علاقوں میں تازہ برف باری، مغل شاہراہ عارضی طور پر بند
دوسری طرف مسلسل بارش کی وجہ سے رامبن کے قریب کیفے ٹیریا موڑ پر زمین کھسکنے کی وجہ سے نیشنل ہائی وے نمبر 44 کو ٹریفک کے لیے بند کر دیا گیا ہے۔ ڈپٹی کمشنر رامبن نے لوگوں کو مشورہ دیا ہے کہ وہ ٹریفک کنٹرول روم سے چیک کرنے کے بعد ہی سفر کریں۔ بارش کی وجہ سے رامبن ضلع کے تمام سرکاری اور نجی اسکول آج کے لیے بند کردیئے گئے ہیں۔
