مقامی لوگوں کی بروقت کارروائی سے مکینوں کو صحیح سلامت نکال لیا گیا اور کسی بھی جانی نقصان کو ہونے سے ٹال دیا گیا۔
پولیس ذرائع کے مطابق خانصاحب علاقے میں محمد کمال وگے ولد غلام محمد وگے ساکنہ قاژواری اور فیاض احمد اہنگر ولد غلام احمد اہنگر ساکنہ یغہ بگ کے رہائشی مکانات کے علاوہ منظور احمد میر ولد عبدالسلام میر ساکنہ حرورہ کا گئو شالہ (کاؤ شیڈ) شدید برفباری کی وجہ سے گر گیا جس سے ان کو شدید نقصان پہنچا۔
وہیں لوگوں کی بروقت کارروائی سے مکینوں کو بنا کسی نقصان کے نکال لیا گیا۔ مقامی باشندوں نے ٹیلی فون پر بتایا کہ ہم نے جلدی کارووائی کی جس کی بدولت سبھی افراد خانہ کو بنا کسی نقصان کے نکال لیا گیا لیکن رہائشی ڈھانچوں کو شدید نقصان پہنچا ہے۔
ان کا مزید کہنا تھا کہ انتظامیہ کی جانب سے ابھی تک کوئی بھی ٹیم ہمارے یہاں نہیں آئی، ایسے ہی چند اور واقعات میں کھاگ میں 02 رہائشی مکانات جبکہ وتہ کلو چاڈورہ میں رہائشی مکانات برف کی وجہ سے گر گئے۔
ضلع انتظامیہ کے کنٹرول روم سے رابطہ کرنے پر انہوں نے بتایا کہ جوں ہی ہماری نوٹس میں یہ بات آئی تو ہم نے نزدیکی ایس ڈی ایم اور تحصیلدار کو فوراً ان مقامات کی جانب اپنی ٹیمیں بھیجنے کے لیے ہدایات دیں اور ساتھ ہی ان مکینوں کے لیے معقول انتظامات کرنے کو بھی کہا۔
