گاندربل: کے پی ایل کنگن پریمئر لیگ کا انعقاد

ملک میں کورونا وبا کے چلتے جہاں ایک طرف مختلف سرگرمیاں ٹھپ ہوکر رہ گئی ہیں وہیں لوگ بھی گھروں تک ہی محدود ہوکر رہ گئے ہیں جبکہ اس وبا کی وجہ سے کھیل کود کی تمام سرگرمیاں بھی معطل ہوگئی ہیں جس کا نوجوانوں کی صحت پر برا اثر پڑا ہے۔

اسی دوران کشمیر میں وسطی ضلع گاندربل کے کنگن علاقے میں نوجوانوں کےلیے، کے پی ایل کنگن پریمیر لیگ کا انعقاد عمل میں لایا گیا جہاں سماجی فاصلہ برقرار رکھتے ہوئے، ماسک اور سنیٹائزر کے استعمال کے علاوہ انٹرنیشنل کرکٹ بورڈ کی جانب سے جاری ہدایات کا خاص خیال رکھا گیا تھا۔

کرکٹ ٹورنمنٹ کا انعقاد کرنے والے نوجوان کھلاڑی نثار احمد نے مقامی نوجوان، انتظامیہ کے ساتھ ساتھ تاجرین کا شکریہ ادا کیا اور کہا کہ ان تمام کے تعاون سے نوجوانوں کےلیے کھیل کود کا موقع فراہم کیا گیا۔

انہوں نے بتایا کہ مختلف علاقوں سے کرکٹ کے شائقین یہاں پہنچے ہیں جبکہ یہاں سماجی فاصلہ کا خاص خیال رکھا جارہا ہے اور ماسک لگانے و سنیٹائزر کے استعمال پر زور دیا جارہا ہے۔ انہوں نے مزید کہا کہ ٹورنمنٹ کے دوران بین الاقوامی کرکٹ بورڈ کی ہدایات پر پوری طرح عمل کیا گیا۔