جنوبی کشمیر کے ضلع اننت ناگ میں کورونا کے بڑھتے معاملات کے مدنظر لاک ڈاؤن میں سختی کی گئی ہے جس کے تحت سول انتظامیہ کے علاؤہ پولیس اور سی آر پی ایف بھی کافی متحرک ہو گئی ہے۔
وادی کشمیر میں سخت لاک ڈاؤن کے دوران لیفٹیننٹ گورنر جی سی مرمو آج اننت ناگ کا دورہ کریں گے۔ وہ کچھ وفود سے ملاقات کریں گے اور ضلع انتظامیہ کے ساتھ ایک اہم میٹنگ کی بھی اطلاع موصول ہوئی ہے۔
دوسری جانب ذرائع ابلاغ کے نمائندوں کو ایل جی کے دورہ اننت ناگ کی بھی عکس بندی کی اجازت نہیں دی گئی۔
یہ بھی پڑھیں
کشمیر: لاک ڈاؤن میں سختی، گھروں میں رہنے کی اپیل
ضلع کے تمام خارجی و داخلی راستوں کو خار دار تاروں سے بند کر دیا گیا ہے۔ کسی کو بھی قصبہ کے اندر داخل ہونے کی اجازت نہیں دی جا رہی ہے۔ خلاف ورزی کی پاداش میں کئی گاڑیوں کو ضبط کر لیا گیا ہے۔
پولیس کے مطابق یہ اقدام لال ڈاؤن کو مزید سختی کے ساتھ عمل میں لانے کے لئے اٹھایا جا رہا ہے۔ پولیس نے عوام سے تعاون کی اپیل کی ہے۔
قابل ذکر ہے کہ جموں و کشمیر میں اس وقت عالمی وبا کے 6540 فعال معاملے ہیں جن میں سے 5200 کشمیر میں ہے اور سرینگر شہر کووڈ کا گڑھ بنا ہوا ہے۔ وہیں ابھی تک اس وائرس سے ہونے والی اموات کی تعداد 263 پہنچ گئی ہے جن میں سے 243 کشمیر میں ہوئی ہے۔
واضح رہے کہ منگل کے روز عالمی وبا کے پیش نظر انتظامیہ نے سالانہ امرناتھ یاترا کو منسوخ کرنے کا فیصلہ بھی لیا تھا۔
