ضلع راجوری میں کورونا وائرس کیسز میں جہاں اضافہ جاری ہے تو وہیں دوسری جانب دو سالہ پری نام کی معصوم بچی اس مہلک وائرس کو شکست دینے میں کامیاب ہوئی ہے جسے ہسپتال انتظامیہ نے تحفوں کے ساتھ گھر روانہ کیا۔
پری کی والدہ نے اس بابت بتایا کہ 'وہ اپنے خاندن کے ساتھ بیرون ریاست سے واپس لوٹے تھے اور جب انہوں نے خاندان کے تمام ارکان کو کورونا ٹیسٹ کروایا تو ان کے چار سالہ بیٹے کی رپورٹ تو منفی آئی جبکہ دو سالہ پری کی رپورٹ مثبت آئی تھی جس کے بعد اسے میڈیکل کالج (راجوری) میں منتقل کیا گیا جہاں 22 روز کے بعد اس نے اس بیماری کو شکست دی۔
بچی کی والدہ نے کہا کہ 'یہ وہ وقت تھا جس کا ایک ایک پل سو سو برس کے برابر تھا بلآخر اس وبا کی شکست ہوئی اور میری بیٹی صحتیاب ہوگئی۔
جموں و کشمیر میں کورونا کے 453 نئے پازیٹیو کیسز
بچی کے ڈسچارج ہونے کے وقت ضلع ترقیاتی کمشنر محمد نذیر شیخ، میڈیکل کالج پرنسپل کلدیپ سنگھ، ایڈیشنل ڈی سی شیر سنگھ، ایڈیشنل ایس پی لیاقت چودھری، میڈیکل کالج سپرنٹنڈنٹ اور دیگر عملہ بھی موجود تھے جہنوں نے اس ننی پری کے صحتیاب ہونے پر مسرت کا اظہار کیا۔
ضلع ترقیاتی کمشنر نے کہا کہ 'راجوری میں کچھ روز سے مثبت کیسز میں اضافہ ہو رہا ہے جبکہ انتظامیہ کی جانب سے مشتبہ افراد کے ٹیسٹ کئے جانے کا سلسلہ بھی جاری ہے اور عوام کو اس سے ڈرنے کی ضروت نہیں ہے جس طرح عوام کی جانب سے تعاون مل رہا ہے ہم اس وبا کو شکست دیں گے کیوں کے راجوری میں اس وبا سے صحتیاب ہونے کی شرح بہت بہتر ہے۔
