ضلع گاندربل کے حلقہ انتخاب صفاپورہ سے آزاد امیدوار عبدالرشید نے ای ٹی وی بھارت کو بتایا کہ اس حلقے میں کل 14 امیدوار ڈی ڈی سی انتخابات میں اپنی قسمت آزمارہے ہیں لیکن اس کے ساتھ ہی رائے دہندگان کے ووٹوں کا زیاں بھی ہوا ہے۔
انھوں نے بتایا کہ حالیہ انتخابات بیلٹ پیپر کے ذریعہ انجام دیے جارہے ہیں لیکن علاقے کے بزرگ و خواتین اور ناخواندہ افراد جو بیلٹ پیپر فولڈ کرنا نہیں جانتے ہیں، اس تعلق سے انھوں نے ووٹنگ عملے سے گزارش کی کہ وہ ایسے ووٹرز کو ووٹ ڈالنے میں تعاون کریں اور بیلٹ پیپر کا صحیح طریقے سے استعمال بتائیں۔
انھوں نے مزید کہا کہ گاندربل علاقے میں سخت سردی کے باوجود لوگ قطار میں کھڑے ہوکر یہاں ووٹ ڈالنے آئے ہیں لیکن یہاں موجود اہلکار و عملہ رائے دہندگان کے ساتھ تعاون کرنے کو راضی نہیں ہے۔ معاملہ علم میں آنے کے بعد عبدالرشید نے عملے سے درخواست کی کہ رائے دہندگان کے ساتھ تعاون کیا جائے۔
ایک سوال کے جواب میں انھوں نے کہا کہ جن لوگوں کے بیلٹ پیپر غلط طریقے سے فولڈ ہوئے ہیں، ان کے ووٹ ضائع ہوچکے ہیں اور یہاں کے ایک بوتھ پر سیکڑوں ووٹ ضائع ہونے کی خبر آئی ہے۔
