جموں و کشمیر انتظامیہ کے ہوم ڈپارٹمنٹ کی جانب سے جمعرات کی شام کو ایک حکم نامہ جاری کیا گیا جس میں یہ واضح کیا گیا کہ جموں کشمیر میں 2 جی انٹرنیٹ خدمات کو معمولاً ایسے ہی جاری رکھا جائے گا اور 3 اپریل تک 4 جی انٹرنیٹ خدمات پر عائد پابندی برقرار رکھی جائے گی۔واضح رہے کہ کورونا وائرس کے دنیا کے ساتھ ساتھ جموں و کشمیر میں بھی تیزی سے پھیلنے کے خدشات کے پیش نظر ملک میں نافذ لاک ڈاؤن کے دوران فور جی کو بحال کرنے کا مطالبہ کیا جارہا ہے-
گزشتہ کئی روز سے متعدد سیاسی رہنماؤں کی جانب سے وادی کشمیر 4جی انٹرنیٹ خدمات کو بحال کرنے کا مطالبہ کیا جارہا ہے- اس سے قبل ڈاکٹر فاروق عبداللہ، عمر عبداللہ، الطاف بخاری اور بی جے پی سے وابستہ کئی لیڈران نے بھی جموں و کشمیر میں 4 جی انٹرنیٹ خدمات کو بحال کرنے کا مطالبہ کیا تھا لیکن انتظامیہ نے فور جی پر عائد پابندی کو برقرار رکھتے ہوئے 3 اپریل تک اس حکمنامے کو برقرار رکھنے کا فیصلہ کیا ہے۔
