پولیس ذرائع کے مطابق ترال کے ہاری پاریگام علاقے میں نوجوان سڑکوں پر نکلے اور سکیورٹی فورسز پر پھتراؤ کرنا شروع کیا۔
واضح رہے کہ 5 اگست کو جموں و کشمیر کی خصوصی آئینی حیثیت دفعہ 370 کی منسوخی کے بعد سے یہ پہلا واقع ہے جب مقامی لوگوں کی جانب سے سکیورٹی فورسز پر پھتراؤ کیا جارہا ہے۔
بتادیں کہ ترال کے ہاری پاریگام میں شدت پسند تنظیم جیش محمد کے دو سے تین پاکستانی عسکریت پسندوں کی موجودگی کی اطلاع ملنے کے بعد اونتی پورہ پولیس اور فوج کے 3 آر آر نے علاقے کو محاصرے میں لے لیا تھا اور تلاشی کارروائی شروع کی تھی جس کے بعد دو طرفہ فائرنگ کا تبادلہ شروع ہوگیا تھا جو ابھی بھی جاری ہے۔
نوجوانوں کی طرف سے کی گئی پتھر بازی کے جواب میں فورسز اہلکاروں نے اشک آور گولے داغے۔ تاہم جھڑپ میں کسی بھی جانی یا مالی نقصان کی کوئی اطلاع نہیں ہے۔
مزید تفصیلات کا انتظار ہے۔
