شمالی کشمیر کے ضلع بارہمولہ کے تحصیل سوپور میں آج علی الصبح اس وقت سنسنی پھیل گئی جب سوپور کے ماڈل ٹاؤن کے بائی پاس علاقے میں مشتبہ عسکریت پسندوں نے سی آر پی ایف کی ناکہ پارٹی پر حملہ کردیا۔
اس حملے میں ایک عام شہری اور سی آر پی ایف کے تین جوان زخمی ہوئے جنہیں بعد میں نزدیکی ہسپتال پہنچایا گیا جہاں زخموں کی تاب نہ لا کر ایک جوان کی موت واقع ہوئی جبکہ ڈاکٹروں نے بتایا کہ عام شہری کی اسپتال پہنچانے سے قبل ہی موت واقع ہوگئی تھی۔
ای ٹی وی بھارت کا نمائندہ جب حملے کی جگہ پہنچا تو وہاں سڑک کے کنارے شہری کی خون میں لت پت لاش موجود تھی۔
وہاں موجود اہلکاروں نے بتایا کہ ہلاک شدہ شخص کے ساتھ ایک تین سالہ بچہ بھی تھا جسے پولیس نے محفوظ مقام پر پہنچا دیا ہے۔
حملے کے بعد اس علاقے کو پولیس اور فوج نے گھیرے میں لے لیا اور اس دوران مقامی پولیس نے اپنی زندگی کو خطرے میں ڈال کر ہلاک شدہ عام شہری کے تین سالہ بچے کی جان بچائی۔
ہلاک شدہ شخص کی شناخت بشیر احمد خان ساکن مصطفیٰ کالونی، زینہ کوٹ سرینگر کے طور ہوئی ہے جو نجی کام کے سلسلے میں سوپور کی جانب محو سفر تھے۔
سرینگر میں انکے بھائی اعجاز احمد خان نے نامہ نگاروں کو بتایا کہ سیکیورٹی فورسز نے انہیں گاڑی سے نیچے اتار کر ہلاک کردیا۔
