سری نگر کے ڈل گیٹ کے بھیڑ بھاڑ والے دونخود علاقے میں ایک گھر میں آگ لگ گئی جو دھیرے دھیرے پھیل گئی۔
یہاں کے عوام کا الزام ہے کہ پانچ اگست کو جموں وکشمیر کا خصوصی درجہ ختم کیے جانے کے بعد سے وادی میں موبائل فون اور انٹرنیٹ خدمات سمیت مواصلات ذرائع پر پابندی کی وجہ سے انھیں افسران کو اطلاع دینے کے لیے فائر اسٹیشن تک جانا پڑا۔
مواصلات کے وسائل پر پابندی کی وجہ سے محکمہ فائربرگیڈ کو آگ لگنے کی اطلاع تاخیر سے ملی اور اس وجہ سے چھ مکان کو پوری طرح سے اور پانچ کو جزوی طور پر نقصان پہنچا۔ آگ پر قابو پانے کی کوشش میں تین افراد جھلس بھی گئے۔
عوام نے الزام عائد کیا کہ تاخیر سے اطلاع ملنے کے باوجود محض دو فائر برگیڈ کی گاڑیاں بھیجی گئیں۔ مقامی افراد کی کوششوں سے آگ پرقابو پایا گیا۔
سرکاری ذرائع نے بتایاکہ گیس کے رِسنے کی وجہ سے یہ آتشزدگی ہوئی۔ آگ میں جھلسنے والوں کو اسپتال میں داخل کروایا گیا۔
