جموں بس اسٹینڈ پر سکیورٹی فورسز نے دھماکہ خیز مواد برآمد کر لیا ہے جس کے فوری بعد علاقے میں سکیورٹی سخت کر دی گئی ہے۔
اس سے قبل جموں و کشمیر پولیس نے قومی شاہراہ پر حملے کے خطرے کے بارے میں متنبہ کیا تھا لہذا سکیورٹی فورس کے اہلکاروں کے کسی بھی قافلے کو شاہراہ پر سفر کرنے کی اجازت نہیں دی جارہی ہے۔
پولیس ذرائع نے بتایا کہ مصدقہ اطلاع موصول ہونے پر جموں پولیس اور دیگر سکیورٹی ایجنسیوں کی ایک ٹیم نے جموں بس اڈے میں ایک تلاشی آپریشن کے دوران 7 کلو وزنی آئی ای ڈی بر آمد کیا۔
انہوں نے بتایا کہ سیکورٹی فورسز کی بر وقت کارروائی سے ایک بڑی مصیبت کو رونما ہونے سے روکا گیا۔
واضح رہے کہ ملک بھر میں آج کے دن 2019 میں پلوامہ خودکش حملے میں ہلاک ہوئے جوانوں کو یاد کیا جارہا ہے۔ اس خودکش حملے میں 40 سے زیادہ بھارتی فوجی ہلاک ہوئے تھے۔ یہ حملہ پلوامہ سے تعلق رکھنے والے ایک کشمیری نوجوان عادل احمد ڈار نے سرانجام دیا تھا۔ گذشتہ کئی دہائیوں میں سکیورٹی فورسز کے خلاف ہونے والا یہ شدید ترین حملہ تھا۔
